Het Juniorcollege, de enige vorm van voortgezet onderwijs wordt met sluiting bedreigd.

Woensdag 28 maart 2001, Budel

In de krânt stoond dae ’t Juniorcollege gesloëten wurt. Dao zien te weinig leerlingen die hiê in Buul nao school willen gaon. De leraren van ’t Juniorcollege zien now gloeiend kaot, want die willen neturluk neet iedere dâg nao Wert fietsen. Dae die schooljóng iedere dâg op de fiets nao Wert moeten, dao gèven ze niks um. Maer as ze dae zêlf moeten doeën, dan verandert dae de zaak. Ozze Sjang zigt dae ’t hun eigen scheuld is daeter neet genôg leerlingen nao ’t Juniorcollege gôn. “Dan hân ze ’t maer ambachtschool moeten laoten,” zigt ozze Sjang. “Dao was niks mis mej.” En ozze Sjang hit wér geliêk! Weje gillie wel daeter iedere dâg bussen vol jônk volk nao Maaseik in Bels riejen. Dao hêmmen ze wél un ambachtschool en dao barst ’t van de leerlingen. Eech heb mich laoten vertellen dae er allieën al oet Craonendoonck 58 jóng iedere dâg mej de bus van Van Asten op en neer nao Maaseik riejen. En de kösten van dae vervoer moeten de âwlui van die kinder zêlf ophoesten. En dae allemaol umdae er in Buul gen ambachtschool mer is. Maer ich wieët wel hoe dae kumt! Dae kumt umdae de meste âwwers van tiggeworig de ambachtschool te min vinnen vur hun jóng. Vruuger was ’t zoë, dae as de kinder van de lieëgere school âfkwâmen, dan gingen de megjes nao de huishoudschool of de naaischool en de jonges gingen nao de ambachtschool. Allieën sommige zeikers oet ’t törp, die menden dae ze wa mier waren, die stuurden hun jóng nao de M.U.L.O., nao mester Drent. Unnen hellen eenkele kier, as ze stêrves goe kósten lieëren, dan gingen ze nao de H.B.S. in Eindhoven of nao de  M.M.S. in Valkenswert. Maer dae wis dan och hieël Buul. As dan de mooder van zoe’n M.M.S.-megje bie Harrieke Roymans un spiêsvlaoi geenk bestellen, dan kâkelde ze zoe haord, dae iederieën ’t toch maer kôs huren. “Ós Annemieke kan toch zoe goe lieëren, dae is echt ’n tiep vur de M.M.S. Ós Josee neet, die is vul te dik.” Zoe geenk dae vruuger. Maer de ambachtschool zaot vol, zoe vol as mien wekflêssen mej proêmen. En ieder jaor kwamen dao jóng bekwaom vakmeensen van âf. Jóng kèrels, die goe kósten timmeren of mêtsen. Mannen die klaor waren um te gôn werken op de bouw of op de zeenk of bie Philips. Jóng meensen die iets mej hun hân kósten mâken. En ’t zien die technische vaklui die vandâg den dâg me hunnen dikke B.M.W. roond riejen, die ze ‘s aovus in hun verwaermde graazje neerzetten. En de megjes die vruuger de huishoudschool gehad hêmmen zien now vröllie die teminste zelf wa kunnen. Die kunnen schôn klieër naaien vur hun kientjes, goe èten koken en zelf ’t hoês biêhawwen. De jóng megjes die tiggeworig un hoêshawwen beginnen kunnen zêlf bekant niks mier. ’t Èten koeëpen ze kant en klaor, zetten ’t un paor minuten in zoe’n opwaerm-mesjientje en klaor is ‘t.  Um ’t hoês biê te hawwen, hêmmen ze un poetsmeid. De zeikers nuumen dae un interieurverzorgster. Maer die hit  vruuger wél op un goei huishoudschool gezèten. Zêlf kunnen die gestudeerde vröllie nog genne kniên klaormaken, laot staon un hin de nêk um draaien. Maer dao gèven zillie naturluk allemaol niks um, as ze hunne stând maer hoeëg kunnen hawwen vur de boêtenwerreld. As ge bevobbeld op unne verjaordâg zit wo veul meensen zien en ge vrogt aen un vrouwke dae neffe ooch zit wo hun jóng mej bezig zien, dan huurde bekant altiêd hetzêlfde. Ze kunnen altiêd goe lieëren en ze wèren allemaol inzenjeur of ze hêmmen allemaol hun “P” al bekant. Wa ’n “P” óch zien mâg! Maer ge huurt nöit ’s zeggen: “Dien awdste van ós wet niks, duut niks, snapt niks, kan niks en is zoe loomp as un vêrreken.” En toch loeëpen er zat van die figuren roond, óch hie in Buul. Maer over die kinder wurt gezwegen. Dao prödde ni over op un festje. ’t Juniorcollege in Buul get deecht. Ozze Sjang zigt dae dae de scheuld is van de onderwijsmaffia in Wert. ’t Bisschoppelijk College wil in Wert ’n neej gebouw. En hoe mier leerlingen in Wert op die school zitten, hoe mier gêld dae ze dao van ’t riêk vur kriêgen. En hoe mier gêld, hoe gröter ’t gebouw en hoe gröter ’t gebouw, hoe hoeëger de status van de directie. En durrum moet de school in Buul deecht. En durrum kunnen ós kinder neet ânders dan nao Wert nao school gaon. En ós gementebestuur zit er biê en kiekt er nao. Zoe zit dae en neet ânders. ’t Is ongepermeteerd!